haal uskaa tere chehre pe likhaa lagtaa hai
vo jo chup-chaap khaRaa hai teraa kyaa lagtaa hai
yuuN terii yaad meN din raat magan rahtaa huuN
dil dhaRaknaa tere qadmoN kii sadaa lagtaa hai
yuuN to har chiiz salaamat hai merii duniyaa meN
ek talluq hai ke jo TuuTaa hu’aa lagtaa hai
ai mere jazba-e-duruuN mujh meN kashish hai itnii
jo Khataa hotaa hai vo tiir bhii aa lagtaa hai
jaane maiN kaunsii pastii meN giraa huuN “Shehzad”
is qadar duur hai suuraj ke diyaa lagtaa hai
No comments:
Post a Comment